[N]系拳四郎

從不少[N]系日牌中可以看出佢o地o既屬性，基本上好多扮緊「來佬野」：

The Viridi-anne，好明顯扮法國Hi野；Number(N)ine，音樂搖滾野；N.Hoolywood，滲少少美式古著的Hi野，咁John Lawrence Sullivan呢？唔好俾個名同佢o既紙牌黑色徽章呃倒，其實都係o架仔野，玩o既範圍比前列份子仲窄，一睇個名就知係拳手野。

我一直有留意佢o既出品，不過大多在減價的時候，因為老實，捨得用正價買衫的話應該數埋腳趾都未輪到佢，咁有乜好留意？我留意的就是John兄點樣可以每季都Keep住佢o既拳手[N]系Style，斷估都唔可以係咁出類似筋肉擂台的K1短褲卦？結果每季在例牌的老西呀、老牛以外，就推出一些最能象徵拳手的有帽衞衣(其實個個牌子都有出)，最出的都算上季的高筒拳師鞋，也是剛巧近年興起高筒籃球鞋襯Skinny Pants所致，難聽d講係擺明有運行，咁仲有乜好玩呀？

或者John兄(當然Designer本身不是叫這名字，架仔來的，乜名？唔銀記得……)都同我一樣在冬天玩過d低能野，就係戴上露趾冷手套扮過下Rocky(或者拳四郎)，所以佢今季就索性出番對俾自己，不過呢對野都幾傳神下，居然玩全套扮拳手戴上拳套前的紮手繃帶(暫知只有黑色，有白色的話應該更傳神)，看圖就知只要戴上再將條尾係咁打圈再將魔術貼貼實即可。

假如黎緊冬天仲係興Plain Style的話(相信都係)，呢d玩野小物就不可多得啦。不過架仔始終係架仔，o個鋪「o靚仔街牌癮」時不時都會發作，搞乜印到自己個牌子隻字咁大方端莊呀？可唔可以印得低調d，或者索性唔印呀，我唔係買緊NEIGHBORHOOD x Undercover呀……

哈呢哈呢の你係咪玩o野

「哈呢」永遠帶給人「哈哈」的歡樂，不要少看她，佢o既生意額隨時勁過唔少扮晒野的日牌呀！我就親眼見過好多o架仔笑晒咁縮起個膞硬試超細身西裝，平平地勝在可以扮下o野，絕對是一眾「窮o架」的扮靚救星！無佢？Hi-End邊可以咁普及呀。況且「哈呢」的「觸覺」都算快，深明o架仔恨死[N]系品牌出品但又冇錢買的心態，自出完Raf Simons魔術貼版高筒Sneakers後再下一城，推出了明玩Rick Owens但只係賣12,600Yen的籃球鞋！基本上單睇條拉鏈同鞋筒已經擺到好明，買完佢再同場買多幾件窄tee加十條Skinny Jeans埋單計數大有可能同Owens哥那對150,000Yen差唔多，隨時仲有得找。當然啦，鞋款明顯單薄d，而且鞋底仲無端端玩埋Stan Smith，至於鞋形呢，就令我諗起有少少似John Lawrence Sullivan今季的拳師鞋……好明顯是集當下流行元素共冶一爐的示範作……實行借Owens哥搵快錢。

熟口熟面？係呀，咪就係我之前o個篇《半過氣のMy Dream Shoes~~但仲好想要囉！》寫的那一對囉，係咪玩o野先……而家。

n.d.c.の如果你只准我揀一個皮鞋牌子咁少

對於穿皮鞋，常有人好奇問我：

Q1.你為甚麼買皮鞋？波鞋不是易襯一點嗎？
Q2.皮鞋不是不舒服嗎？像是穿得很辛苦呢！
Q3.嘩，著皮鞋喎，玩HI-END呀？成熟風是嗎？
Q4.皮鞋穿上腳很細隻，怪怪的……不是嗎？

對於這些問題，我不懂答，也不反感，因為個人的穿衣之道是沒有必要旁人去明白，又或者我在別人眼中是個怪人……但我在心裏會反問：波鞋一定易襯的嗎？

多年來，我買波鞋都算多，但個人認為難襯的卻佔大多數，除非你是「運動型」或「求其無所謂型」，否則單是一對最大路的AIR JORDAN、AIR MAX等，已是和很多衣服不相襯，結果最後搬屋後只剩下一些classic得緊要的adidas、VANS和Converse，忍痛飛出後巷最多的一定是NIKE。所以，這些年來我決定回到以前未入行的我，只會捨得俾錢買可以著很耐且耐看的皮鞋（但不會是Red Wing，我不是那種喜歡看著它日漸殘舊的愛好者），鞋底爛了花幾廿蚊拿去補，至少至少一對可以著幾年，對於這年紀的我，實在實在慳了很多錢，而且數量對於我來說已無意義，尋求和享受Hi Quality才是我現在買物的重點。

由兩位設計師組合而成的n.d.c.，一位曾在Lacoste工作6年，而另一位則是來自Kickers，所有鞋製品全Made By Hand，絕少搞宣傳只會專注造鞋手藝，正是如果有人問我要揀一個皮鞋牌子買左一定冇衰的選擇，你知啦，好多人最鍾意問這類Best Buy問題，而n.d.c.亦可解答埋上文的4條Q：

A1.n.d.c.款式簡單，但details如仿Vintage褪色、勁蹺鞋頭等卻是滿分，基本上乜褲都襯到，除左運動褲。
A2.n.d.c.皮質柔軟，手工堪稱無垢，鞋形恰到好處，企得耐反而比Visvim、NB、Air Presto更舒服，腳踭唔會痛。
A3.n.d.c.是界乎Classic與流行元素之間，只要你平日是著開Fit身或細身衫，就算是tee + 牛仔褲、西裝Style乜end都得，包你變帥哥。
A4.這個問題不用擔心，基本上n.d.c.的鞋形是比一般皮鞋大的，只要你穿的褲腳不要過闊便不會顯得細小。

老老實實，上次我到日本American Rag Cie有個型Sales就係著住最新一季的n.d.c.，簡單一件無地Tee + 西褲已經足夠令他的樣子神氣起來，而最緊要是香港售價對比日本合理得多，而且在手工及價錢方面一定比不少fashion品牌如CdG、MMM的好及抵買，鞋踭的生膠勁襟，不少人都等老連、I.T減價掃貨，好快冇Size。我的一對，已穿了接近兩年，堪稱「後生仔Best Buy皮鞋」，年過三十，要有一對。

BIAS：Skull彈出の傳奇骷髏標本

早在上年夏天，已在BEAMS云云Tee海中留意到這個面世無耐的日牌BIAS，留意她純粹是因為骷髏囉，冇其他，但當你看到同場其他擺明是炮灰的Skull彈出的產物時，你會發覺Bias算是做得有誠意，亦會明白為何一味玩Skull都會彈得出（淨計Print咋）。

BIAS玩骷髏，唔好懶清高話唔係食mastermind JAPAN、Roen個勢，之不過食口水尾都要用下腦，絕招是把世上已逝世的傳奇人物變成骷髏（留意，是已去世的，唔係點會變成骷髏？）。第一件推出的是Einstein，後來Number(N)ine、Pledge再三玩Kurt Cobain，佢就食時間把他變埋骷髏，至於John Lennon嘛，勝在夠mass啦。另外，出出下又出埋Stanley Kubrick（1928-1999）、頭戴Porkpie Hat的「毒王作家」William S. Burroughs（1914-1997）、L.A詩人及小說作家Charles Bukowski（1920-1994）……小小偏，cult cult地咁，還好Skull下面加番個名，唔係有d真係唔知乜水。BIAS呢招去到冬天就會把Tee變成Sweater，春天就變中袖，買來買去都係靠以上呢班亡魂搵食，無敵架，捱到一兩年貨仔架。

儲下儲下，可能BIAS依家都發覺佢個Skull Family人數眾多，可以再發圍，所以最近就出埋原畫，有埋畫框，成張車頭相咁俾你放在家中供奉……（Tee 7,140Yen, 中袖Tee 10,290Yen, Painting 9,450Yen）

P.S. BIAS設計師小松孝志是從Number(N)ine中走出來獨立發展的。另外，原來還有一款是美國著名怪雞插畫家Edward Gorey(1925-2000)呀，究竟我還有沒有看漏呢？

再P.S. 死火，真的漏了，而且還要是兩件，一件是美國詩人Allen Ginsberg(1926-1997)，而另一件則是美國詩人兼小說家Jack Kerouac(1922-1969)，出夠未呀……冇喇卦。